A vulintà di a nostra cunfraternita dapoi a so rinascita in u 2004, attempu chì a criazioni di u so associu "Mimoria Viva", hè di mantena una vita suciali, culturali è rilighjosa in u paesi di I Peri è di modu più largu, ind'è u so circondu di a Gravona. Forti oghji d'una sparienza di 20 anni di travagliu è à capu di i cambiamenti chì trimuleghjani a sucità corsa, a nostra vodda hè d'allargà a nostra andatura par via di issa piattaforma, ammasgiulendu cusì tutt'i risorzi nicissarii da pudè dà l'uccasioni à quiddi chì sò vulinteri, ghjovani ò micca, pà rilancià, crià ò mantena una cunfraternita. Tandu, pudareti ritruvà annant'à un puntu solu :

​

• Una capiscitura di u sensu sodu d'una cunfraternita, i so leghji, i filusuffìi da ritena, u scopu di u cunfrateddu

• Un giru di i canti sacri tradiziunali, i paroddi è i so versi, ripigliendu l'arii Rusinchi ò Sermaninchi

• Un ochjata di a liturgia, vali à dì i mumenti impurtanti di a messa, a manera di piazzà si, d'aiutà a cummunità ò u preti ind'è i so cilibrazioni

• Una pussibilità di tilicaricà tutt'i ducumenti scritti principali : quaternu di canti, prigheri, ecc.

• L'almanaccu di tutt'i dati da ritena è ad appruntà : Natali, Quarèsima, Pasqua, ecc.

​

U scopu quì hè di cintralizà tutti l'infurmazioni in giru à a vita d'un cunfrateddu, di fattu. Spiremi chì issu situ sarà una pussibilità pà tutt'i parsoni vulinteri ò micca di lampàssi annant'à u caminu di i cunfraterniti incù tuttu l'aiutu chì si pò. Issa strada hè difficiuli, incù parechji duveri è rispunsabilità, mà ferma l'attrazzi u più ghjuvaticciu di a spiritualità, di u patrimoniu è di a leia suciali nustrali.